ბოროელთა მთავარმა მწვრთნელმა გარეტ საუთგეიტმა მცველის ძიება მას შემდეგ დაიწყო, რაც უკანა ხაზში მწვავე პრობლემა შეექმნა. კლუბმა რობერტ ჰუტი “სტოკში” გაყიდა, მეტიუ ბეიტსი მძიმედ ტრავმირებულია და ასპარეზობას სეზონის ბოლომდე ვერ შეძლებს, კაპიტანი ემანუელ პოგატეცსა და კრის რიგოტს კი ასევე სხვადასხვა სახის დაზიანებები აქვთ და მინდორზე გასვლას ვერ ახერხებენ.

ამ ფონზე “მიდლსბროს” პირველ გუნდში თამაშის გამოცდილებით ერთადერთი მცველი დევიდ უიტერი შერჩა და მას კაპიტნის სამკლაურიც უბოძა, საუთგეიტმა კი სატრანსფერო ბაზარზე აქტიურობა დაიწყო.

თავდაპირველად, ბოროელები “შეფილდ იუნაიტედის” წევრ მეტიუ კილგალონისა და “პრესტონის” მოთამაშე შონ ლედგერის გადაბირებაზე მუშაობდნენ, თუმცა, როდესაც ხელი მოეცარათ, აქცენტი ქართველ მცველზე გადაიტანეს.

საუბარია იჯარაზე, რომლის თანახმადაც ხიზანიშვილი “მიდსლბროში” სეზონის ბოლომდე დარჩება, შემდეგ კი მხარეები დამატებით მოლაპარაკებას გამართავენ.

ცნობისთვის, საუთგეიტის გუნდი პრემიერლიგიდან პირველ დივიზიონში გასული სეზონის შედეგების მიხედვით დაქვეითდა და ამჟამად, 5 ტურის თავზე 10 ქულით მე-4 ადგილზე იმყოფება.

09.2009